შატილში ჰესის რეაბილიტაცია ერთი თვის განმავლობაში დასრულდება – საქართველოს მთავრობა

2016.10.18  |  11:29
შატილში ჰესის რეაბილიტაცია ერთი თვის განმავლობაში დასრულდება – საქართველოს მთავრობა

მცირე ჰესის მწყობრიდან გამოსვლის გამო, შატილში შექმნილი მდგომარეობის აღმოსაფხვრელად და ადგილობრივი მოსახლეობისათვის პირობების შესამსუბუქებლად, ყველა შესაბამისი სახელმწიფო სტრუქტურა  და ადგილობრივი ხელისუფლება კოორდინირებულად  და ოპერატიულად მუშაობს, – ნათქვამია საქართველოს მთავრობის მიერ გავრცელებულ განცხადებაში.

„შატილში მწყობრიდან გამოსული მცირე ჰესის რეაბილიტაცია დაზიანების დღიდან  დაჩქარებულ რეჟიმში მიმდინარეობს და  ერთი თვის განმავლობაში დასრულდება, რისთვისაც ენერგეტიკის სამინისტროს შესაბამისი სამსახურები საგანგებო რეჟიმში მუშაობენ. მცირე ჰესის რეაბილიტაციის შემდეგ კი,  შატილს სრული - 24-საათიანი ელექტრომომარაგება აღუდგება.

 

ჰესის აგრეგატების დაზიანების მიუხედავად, შატილის მოსახლეობა დენის გარეშე არ არის დარჩენილი, რადგან, ენერგეტიკის სამინისტროსა და  „თელასის“ დახმარებით, შატილში ჩატანილია დენის მძლავრი გენერატორი (65 კვტ ) და 7 ტონა საწვავი, რის შედეგადაც, სოფლის მოსახლეობას ელექტროენერგია გრაფიკით მიეწოდება (დილის 9:00 სთ-დან- 11:00სთ-მდე; საღამოს 19:00სთ-დან - 23:00სთ-მდე, სულ- 6 საათი ).

 

გარდა ამისა, ადგილობრივი ხელისუფლების მიერ, შატილის სკოლა-ინტერნატი მარაგდება შეშით, ხოლო იქ მცხოვრებ ოჯახებს (სულ 13 ოჯახი) 25 კუბური მეტრი საშეშე მერქანი დაურიგდებათ.

 

ასევე, საქართველოს საავტომობილო გზების დეპარტამენტის მიერ, ჟინვალი-ბარისახო-შატილის საავტომობილო გზაზე, კერძოდ უღელტეხილზე, მობილიზებულია შესაბამისი ტექნიკა და  უამინდობის  შემთხვევაში, განხორციელდება გზის გაწმენდითი სამუშაოები.  ამ დროისთვის ჟინვალი-ბარისახო-შატილის საავტომობილო გზაზე, კერძოდ უღელტეხილზე, თოვლის საფარი 10 სანტიმეტრს არ აღემატება“, – აღნიშნულია განცხადებაში.

 

მცხეთა – მთიანეთის საინფორმაციო ცენტრმა გუშინ გაავრცელა ინფორმაცია, რომ ერთი თვეა შატილი ელექტროენერგიის გარეშეა დარჩენილი. მცირე ჰესი, რომელიც შატილს ელექტროენერგიით ამარაგებდა, მწყობრიდან გამოვიდა და დაზუსტებით არ იყო ცნობილი, როდის შეძლებდა ხელისუფლება მის აღდგენას. სოფელში ამ დროისთვის 13 ოჯახია დარჩენილი. შატილში პროგრამის „ასწავლე საქართველოში“ ფარგლებში ჩასული რამდენიმე მასწავლებელიც ცხოვრობს, რომლებიც გათბობის გარეშე არიან დარჩენილები.