მეუფე ილარიონი სამთავროს დედათა მონასტრის წევრებს ფიზიკურ ანგარიშსწორებაში ადანაშაულებს

2015.11.26  |  08:01
მეუფე ილარიონი სამთავროს დედათა მონასტრის წევრებს ფიზიკურ ანგარიშსწორებაში ადანაშაულებს

მეუფე ილარიონი და დედა ნინო (ნათია სირაძე) სამთავროს დედათა მონასტრის მღვდლებსა და სტიქაროსნებს ფიზიკურ ანგარიშსწორებაში ადანაშაულებენ. დედა ნინოს ინფორმაციით, ინციდენტი გიორგობის დღესასწაულზე მოხდა, სადაც მისივე მტკიცებით, მონასტრის წევრები მას და წირვაზე მისულ მეუფე ილარიონ სამხარაძეს ფიზიკურად გაუსწორდნენ.

მისივე განმარტებით, მეუფე ილარიონ სამხარაძე ტაძარში მრევლს ლოცავდა, რა დროსაც იქ მყოფმა ერთ-ერთმა მღვდელმა მრევლს უთხრა, რომ ილარიონ სამხარაძე მეუფე არ არის.

 

„მე და მეუფე ტაძარში მივედით, მეუფე მრევლს ლოცავდა, რა დროსაც ერთ-ერთმა მამაომ მრევლს რამდენჯერმე უთხრა, რომ ის მეუფე არ იყო, მე ამის გამო აღვშფოთდი და მას ვუთხარი, რომ იტყუებოდა. ამის შემდეგ ტაძრიდან გამათრიეს, მეუფეს კი ტაძარში ფიზიკურად გაუსწორდნენ. ისევ ავდექი და პატრული გამოვიძახე. უბრალო მოხუცი რომ შესულიყო, იმასაც არ უნდა მოქცეოდნენ ასე, მეუფე ილარიონ სამხარაძე კი 40 წელიწადია მღვდელმთავარია“, – განაცხადა დედა ნინომ.

 

მონასტრის წევრის დედა ბარბარეს თქმით, ინციდენტი ტაძარში მეუფე ილარიონისა და მისი თანმხლები ქალბატონის მიერ წირვის ჩაშლის მცდელობას მოჰყვა.

 

„წირვის მიმდინარეობისას შემოვიდა ტაძარში, იატაკზე ჯოხს აბრახუნებდა და იწყევლებოდა და წირვის მსვლელობას ხელს უშლიდა, რაზეც შენიშვნა მისცეს. ეს იყო და ეს, არც ხელით შეხებას და, მით უმეტეს, ცემის ფაქტს ადგილი არ ჰქონია. როგორც ვიცი, მსგავსი ფაქტი პირველი არ არის მისი მხრიდან“, – აღნიშნა დედაომ.

 

ცემის ფაქტს და მონასტრის წევრების ინციდენტში მონაწილეობას არ ადასტურებს საპატრიარქო, სადაც განმარტავენ, რომ ილარიონ სამხარაძე მოქმედი მღვდელმთავარი არ არის და ამიტომ ინციდენტი ტაძარში მრევლის მიმართ მისმა მოწოდებებმა გამოიწვია.

 

მომხდარზე მიმდინარეობს გამოძიება. საქმეზე მოწმის სტატუსით სამართალდამცავებმა უკვე რამდენიმე პირი დაკითხეს.