ლიტერატურული კონკურსი „წერო“ გამოცხადდა

2015.10.22  |  12:38
ლიტერატურული კონკურსი „წერო“ გამოცხადდა

ლიტერატურული კონკურსი „წერო“ დაიწყო. კონკურსში მონაწილეობის მიღება შეუძლია ნებისმიერ მსურველს. მსურველები ვებგვერდზე - lit.ge 22 ოქტომბრიდან 12 ნოემბრამდე უნდა დარეგისტრირდნენ და გამოაქვეყნონ 5-10 გვერდიანი საკონკურსო ნაწარმოები.

ლიტერატურული კონკურსი „წერო“ ელექტრონული წიგნების ვებ–გვერდის „lit.ge“-ის მეშვეობით, ინტერნეტ სივრცეში განხორციელდება. კონკურსი ჩატარდება ორ ეტაპად: პირველ ეტაპზე საუკეთესო ნაწარმოებებს გამოავლენს კონკურსის 7-კაციანი ჟიური (ჟიურის წევრები არიან მწერლები, რედაქტორები, კრიტიკოსები). მეორე ეტაპზე შერჩეულ ნაწარმოებებს შეაფასებს და გამარჯვებულებს გამოავლენს მკითხველი. მკითხველებს საშუალება ექნებათ კონკურსის გვერდზე გამოთქვან თავიანთი მოსაზრებები ნაწარმოებების შესახებ. ყველაზე აქტიური მკითხველები დასაჩუქრდებიან ელექტრონული მაღაზია lit.ge-ის ვაუჩერებით.

 

გამარჯვებულთა ვინაობა (I, II, III ადგილები, ჟიურის სპეციალური პრიზი და სხვა პრიზები) გამოცხადდება დაჯილდოების ცერემონიალზე, 11 დეკემბერს საქართველოს მწერალთა სახლში.

 

პირველი პრემიის მფლობელი მიიღებს ლიტერატურული პრემიას „წერო“ და 4000 ლარი; მეორე პრემია: 2000 ლარი; მესამე პრემია: 1000 ლარი.

 

კონკურსანტმა ნაწარმოებს უნდა დაურთოს მცირე ანოტაცია. ავტორის ვინაობა აუცილებელია მითითებული იყოს შესაბამის ველში, წინააღმდეგ შემთხვევაში, ნაწარმოები არ მიიღება. კონკურსის მიმდინარეობისას, ავტორის ვინაობა იქნება დაფარული. ავტორს შეუძლია წარმოადგინოს მხოლოდ ერთი საკონკურსო ნაწარმოები. საკონკურსო ნაშრომი არ უნდა იყოს გამოქვეყნებული ბეჭდვით გამოცემებში ან ინტერნეტ-სივრცეში.

 

ლიტერატურული კონკურსი „წერო“ ტრადიციულად საქართველოს კულტურისა და ძეგლთა დაცვის სამინისტროს მხარდაჭერით ხორციელდება. კონკურსის ორგანიზატორი ელექტრონული წიგნების მაღაზია „Lit.ge“ და ფარმაცევტული კომპანია GPC-ია.