სასამართლომ „ყაზბეგი ჰესის“ წინააღმდეგ დაწყებული საქმისწარმოება შეწყვიტა

2014.11.18  |  19:29
სასამართლომ „ყაზბეგი ჰესის“ წინააღმდეგ დაწყებული საქმისწარმოება შეწყვიტა

გარემოსდაცვითი ზედამხედველობის დეპარტამენტმა, ეკოლოგიური ექსპერტიზის დასკვნის პირობის დარღვევის, კერძოდ, წყლის ხარჯის შესახებ ინფორმაციის სამინისტროში პერიოდულად წარუდგენლობის გამო, „ყაზბეგი ჰესის“ მიმართ სამართალდარღვევის ოქმი 8 ივლისს შეადგინა, რაც 5 000 ლარიან ჯარიმას ითვალისწინებდა.

„ექსპერტიზის დასკვნის შესაბამისად, კომპანია ვალდებული იყო მოეწყო წყლის ავტომატური ხარჯმზომი და ყოველდღიური გაზომვების თაობაზე ინფორმაცია წარმოედგინა კვარტალში ერთხელ სამინისტროში, თუმცა მათ მიერ წარმოდგენილი იქნა წყლის ხარჯის გაზომვის მხოლოდ 6 მონაცემი“, - განუცხადეს მცხეთა-მთიანეთის საინფორმაციო ცენტრს სამინისტროში.

 

ადმინისტრაციულ სამართალდარღვევათა კოდექსის 792  მუხლის შესაბამისად, აღნიშნული გარემოზე ზემოქმედების ნებართვის ან ეკოლოგიური ექსპერტიზის დასკვნით გათვალისწინებული პირობების დარღვევაა.

 

„მოსამართლე ინგა კვაჭანტირაძემ, პროცესის 4-ჯერ გადადების შემდეგ, ვადის გასვლის  გამო, საქმის წარმოების შეწყვეტის შესახებ გამოიტანა დადგენილება. მასალები ჩვენი მხრიდან დროულად გადაიგზავნა სასამართლოში, დროულად მოხდა ჩანიშვნა, ადმინისტრაციული სახდელის დადების 4-თვიანი ვადა თავისუფლად ჰქონდა მოსამართლეს, მაგრამ არვიცი რა მიზეზით გაუშვა ეს ვადა. საქმე შეწყდა და „ყაზბეგი ჰესს“ ჯარიმა არ დაეკისრა“, - განუცხადა მცხეთა-მთიანეთის საინფორმაციო ცენტრს გარემოსდაცვითი ზედამხედველობის დეპარტამენტის მთავარმა სახელმწიფო ინსპექტორმა, ნელი კორკოტაძემ.

 

მისივე თქმით, აღნიშნული გადაწყვეტილება სააპელაციო სასამართლოშია გასაჩივრებული.

 

„ყაზბეგი ჰესის“ მშენებლობა 2012 წელს დაიწყო, რასაც არასამთავრობოები და მოსახლეობის ნაწილი აპროტესტებდნენ. ჰესის პროექტი კილომეტრზე მეტ მანძილზე მდინარე ბროლისწყლის 90%–ის მილსადენში მოქცევას ითვალისწინებდა, რაც არასამთავრობოების თქმით, „წითელ წიგნში“ შეტანილ ხდის ხეობას საფრთხეს შეუქმნიდა.

 

2012 წლის საპარლამენტო არჩევნების შემდეგ, ჰესის მშენებლობა დროებით შეჩერდა და  სამინისტრომ მის მშენებლობაზე ნებართვა არ გასცა. 2013 წელს, ინვესტორმა კომპანიამ გარემოს დაცვის სამინისტროს „ყაზბეგი ჰესის“ მშენებლობის მოთხოვნით ისევ მიმართა. წლის ბოლოს, სამინისტრომ ჰესის აშენებაზე დადებითი ეკოლოგიური ექსპერტიზის დასკვნა გასცა.

 

„ყაზბეგი ჰესი“ ექსპლუატაციაში 2014 წლის 16 ოქტომბერს შევიდა.