„ყაზბეგი ჰესის“ ექსპლუატაციაში შესვლის შემდეგ მდინარის კალაპოტში წყალი თითქმის აღარ დარჩა - შოთა ბუჩუკური

2014.11.06  |  17:19
„ყაზბეგი ჰესის“  ექსპლუატაციაში შესვლის შემდეგ მდინარის კალაპოტში წყალი თითქმის აღარ დარჩა - შოთა ბუჩუკური

არასამთავრობო ორგანიზაცია „სტეფანწმინდას“ წარმომადგენლის შოთა ბუჩუკურის ინფორმაციით, ხდის ხეობაში „ყაზბეგი ჰესის“  ექსპლუატაციაში შესვლის შემდეგ, მდინარე ბროლისწყალის (ხდისწყალი) კალაპოტში ძალიან ცოტა წყალი დარჩა. როგორც შოთა ბუჩუკურმა მცხეთა-მთიანეთის საინფორმაციო ცენტრს განუცხადა, მდინარის წყალს თითქმის მთლიანად ჰიდროელექტროსადგური მოიხმარს და 1 კილომეტრის მონაკვეთზე  კალაპოტი წყლის გარეშე რჩება.  

შოთა ბუჩუკურმა მდინარე ბროლისწყალზე გადაღებული ფოტოებიც გაავრცელა.

 

„მდინარის კალაპოტში იმდენად ცოტა წყალია დატოვებული, რომ არც კი ჩანს საერთოდ თუ არის წყალი. ფოტოზე რაც ჩანს, მილიდან გამოსული წყალი, ეს არის ჰესმა რაც გამოიყენა უკვე და ისევ ბრუნდება კალაპოტში. ხოლო კალაპოტში რა წყალიც ჩანს, ეს არის ძალიან ცოტა, ნაკადულიც არ არის, ალბათ ონკანზე რომ მოუშვა, იმდენი წყალია კალაპოტში დატოვებული. გამოდის, რომ 1 კილომეტრ მონაკვეთზე წყალი საერთოდ აღარ რჩება. რამდენად საკმარისია ეს წყალი ბიომრავალფეროვნებისთვის, საინტერესოა. გარემოს დაცვის სამინისტრომ როცა გასცა დასკვნა, ეწერა, რომ განსაკუთრებული მონიტორინგი განხორციელდებოდა. რამდენად ხორციელდება მონიტორინგი არვიცი, ფაქტია, რომ ერთი შეხედვითაც ჩანს, ეს წყალი, რაც კალაპოტშია, არანაირად არ იქნება საკმარისი ეკოსისტემის ნორმალური ფუნქციონირებისთვის“, - განუცხადა მცხეთა-მთიანეთის საინფორმაციო ცენტრს შოთა ბუჩუკურმა.

 

გარემოს და ბუნებრივი რესურსების დაცვის სამინისტროს განცხადებით, ორგანიზაცია „სტეფანწმინდას“ მიერ გავრცელებული ინფორმაციის საფუძველზე, სამინისტროს წარმომადგენლები ბროლისწყალზე შესაბამის გაზომვით სამუშაოებს ჩაატარებენ.

 

„სოციალურ ქსელში გავრცელებული ინფორმაციის  გადამოწმების მიზნით, გარემოს ეროვნული სააგენტოს და გარემოსდაცვითი ზედამხედველობის დეპარტამენტის შესაბამისი უფლებამოსილი პირები უახლოეს პერიოდში განახორციელებენ ხდისწყალზე (ბროლისწყალზე) ჰიდრომეტრულ გაზომვითი სამუშაოების ჩატარებას და შესაბამისად ეკოლოგიური ხარჯის მონიტორინგს. შესწავლის შედეგების გათვალისწინებით მოხდება შესაბამისი რეგირება“, - განუცხადეს მცხეთა-მთიანეთის საინფორმაციო ცენტრს სამინისტროში.

 

ყაზბეგში, მდინარე ბროლისწყალზე აშენებული „ყაზბეგი ჰესი“ ექსპლუატაციაში 2014 წლის 16 ოქტომბერს შევიდა. ჰესი ენერგეტიკის მინისტრმა კახა კალაძემ გახსნა. „ყაზბეგი ჰესი“ კომპანია „ფერი“-მ ააშენა.

 

ჰესის მშენებლობა 2012 წელს დაიწყო. გზშ ანგარიშის მიხედვით, ჰიდროელექტროსადგური დერივაციული ტიპის უნდა ყოფილიყო და დერივაციის მონაკვეთში (1 კმ-ზე მეტ მანძილზე)  ბროლისწყლის 90%–ის მილსადენში მოქცევას ითვალისწინებდა. ჰესის მშენებლობა არასამთავრობო ორგანიზაციებმა და მოსახლეობის ნაწილმა გააპროტესტეს. ჰიდროელექტროსადგურის მშენებლობის შესაჩერებლად ხელმოწერების შეგროვებაც დაიწყო. არასამთავრობოები აცხადებდნენ, რომ ჰესის აშენება „წითელ წიგნში“ შეტანილ ბუნების ძეგლს - ხდის ხეობას, ასევე მის ფლორას და ფაუნას საფრთხეს შეუქმნიდა და ლანდშაფტის შეუქცევად დეგრადაცია – განადგურებას გამოიწვევდა. „მწვანე ალტერნატივას“ განცხადებით, პროექტი „წითელ ნუსხაში“ შეტანილ წავსა და ტბის კალმახზე უარყოფით ზეგავლენას მოახდენდა, თუმცა ამაზე გზშ ანგარიშში არაფერი იყო ნათქვამი. მათივე შეფასებით, კომპანიის მიერ წარმოდგენილი გარემოზე ზემოქმედების შეფასების ანგარიში (გზშ) უხარისხო იყო და არ წარმოაჩენდა პროექტის გარემოზე შესაძლო ზეგავლენის შედეგებს. 

 

2012 წლის საპარლამენტო არჩევნების შემდეგ, ჰესის მშენებლობა დროებით შეჩერდა. ინვესტორის დაპირების მიუხედავად, რომ შემარბილებელ ღონისძიებებს გამოიყენებდნენ, გარემოს დაცვის სამინისტრომ ჰესის მშენებლობაზე ნებართვა არ გასცა.

 

2013 წელს, ივესტორმა კომპანიამ გარემოს დაცვის სამინისტროს „ყაზბეგი ჰესის“ მშენებლობის მოთხოვნით ისევ მიმართა. კომპანია „ფერის“ წარმომადგენელმა ლაშა იორდანიშვილმა განაცხადა, რომ ახალი გზშ ანგარიში გარემოსდამცველების და გარემოს დაცვის სამინისტროს რეკომენდაციების გათვალისწინებით შეიქმნა. 2013 წლის ბოლოს, სამინისტრომ ჰესის აშენებაზე დადებითი ეკოლოგიური ექსპერტიზის დასკვნა გასცა.



შოთა ბუჩუკურის ფოტოები