არცერთი ჰიდროელექტროსადგურის პროექტი შესწავლის გარეშე არ განხორციელებულა - ირაკლი ღარიბაშვილი

2014.10.27  |  14:22
არცერთი ჰიდროელექტროსადგურის პროექტი შესწავლის გარეშე არ განხორციელებულა - ირაკლი ღარიბაშვილი

„მე ვიცი, რომ საზოგადოებას აღელვებს ჰიდროელექტროსადგურების თემა, მაგრამ გარწმუნებთ, რომ არცერთი პროექტი შესწავლის გარეშე არ განხორციელებულა ჩვენი მთავრობის დროს და არც განხორციელდება“, - განაცხადა პრემიერ-მინისტრმა ირაკლი ღარიბაშვილმა მთავრობის ორი წლის საქმიანობის ანგარიშის პრეზენტაციაზე. 

მისივე თქმით, ყველა რისკი, რომელიც ჰიდროელექტროსადგურების მშენებლობას ახლავს, მინიმუმამდე იქნება დაყვანილი.

 

„მოგეხსენებათ, თუ რამხელს მნიშვნელობა აქვს ჩვენი ქვეყნისთვის ენერგოდამოუკიდებლობას. ჩვენ მაქსიმალურად, რაციონალურად უნდა ავითვისოთ ყველა რესურსი, რათა ენერგოსექტორი გახდეს განვითარებული და ძლიერი. უკვე ამუშავდა 7 ახალი ჰიდროელექტროსადგური და მხოლოდ ენერგეტიკაში 347 მილიონი დოლარის პირდაპირი უცხოური ინვესტიცია განხორციელდა. ჩვენ რათქმაუნდა ყველაფერს კარგად ვსწავლობთ, ვაანალიზებთ და კვალიფიციური ექსპერტიზის დასკვნების შემდეგ ვიწყებთ ამ პროექტების განხორციელებას. ამიტომ მინდა ვუთხრა მოქალაქეებს, რომ ყველა რისკი, რომელიც ახლავს დიდი პროექტების მშენებლობას იქნება მინიმუმამდე დაყვანილი, მე ამას გპირდებით“, - განაცხადა ირაკლი ღარიბაშვილმა.

 

მისივე თქმით, ჰიდროელექტროსადგურების გარდა საქარველოს მთავრობა  ალტერნატიულ წყაროებზე - ქარის სადგურების პროექტების განხორციელებაზეც მუშაობს.