გაერთიანებული სამეფოს 10 უძველესი ქალაქი [Photos]

2015.05.20  |  18:38
გაერთიანებული სამეფოს 10 უძველესი ქალაქი [Photos]

დიდი ბრიტანეთისა და ჩრდილოეთ ირლანდიის გაერთიანებულ სამეფოს უძველესი ისტორია აქვს, თუმცა შესაძლოა თავად ქვეყანაზე უფრო ძველი ისტორია ინგლისში, უელსსა და ჩრდილო ირლანდიაში მდებარე ზოგიერთ ქალაქს ქონდეს.

ზუსტი თარიღების დადგენა საკმაოდ  რთულია და ზუსტი სიის შედგენა ქალაქთა სიძველის მიხედვით შეუძლებელია.

 

The Telegraph-ის მიერ გამოქვეყნებული 10 ბრიტანულ ქალაქის სია კვლევებით დადგენილი ასაკისა და სამშენებლო თარიღებზე დაყრდნობითაა შედგენილი.

 

კარიკფერგუსი, ჩრდ. ირლანდია: „ქალაქის შესახებ უძველესი ცნობები მცირე და გარკვეულწილად ლეგენდარულია!“ – ამტკიცებს 1909 წლის გამოცემაში ისტორიკოსი სამუელ მაკსკიმინი. მისი მიხედვით ქრისტეშობამდე სამი საუკუნით ადრე ამ ქალაქში კელტები სახლობდნენ, თუმცა ოფიციალური ცნობა ქალაქის შესახებ 1167 წელს ჩნდება, ანგლო-ნორმანი რაინდის, ჯონ დე კურსის შემოსევის შემდეგ.

 

სელბი, დასავლეთ იორკშირი: ქალაქის სააბატოს დაარსების წესდება 1070 წლით თარიღდება. უილიამ დამპყრობელმა სააბატოს ასაშენებლად პატარა მიწა გამოყო, ამას მოწმობს უამრავი ჩანაწერი, ცნობა და მტკიცებულება სააბატოს სამეფო კუთვნილების შესახებ. საუკუნეების შემდეგ ქალაქი ქვანახშირის მოპოვებისა და გემთმშენებლობის ცენტრი გახდა, თუმცა მსგავსი ინდუსტრია დღეს აღარ არსებობს.

 

ლოუსტოფტი, საფოლკი: აღმოსავლეთ სანაპიროზე მდებარე ქალაქის სახელი ვიკინგური წარმოშობისაა და მიიღება ორი სიტყვისგან: „ჰლოთვერ“ – საკუთარი სახელი და „ტოფტ“ – სკანდინავიურად კარ-მიდამო. 1086 წლით დათარიღებულ ჩანაწერებში აქ ოცამდე ოჯახი იყო დაფიქსირებული. 1349 წლის შავი ჭირის შემდეგ მოსახლეობის 90% დაიღუპა, თუმცა ქალაქი ხელახლა აღორძინდა გვიან შუა საუკუნეებში. ქალაქის პორტი 1831 წელს გაიხსნა და დღეს 60-ათასიანი ქალაქი საზღვაო ისტორიით, მუზეუმებითა და სანაპიროთი იზიდავს ტურისტებს.

 

უიტბი, ჩრდილო იორკშირი: თვალწარმტაცი ქალაქი მდინარე ესკზე მეექვსე-მეცხრე საუკუნეებში ცნობილი იყო როგორც: სტრეანაესჰალკი, სტრენესჰალკი, სტრეონესჰალხი, სტრეუნეს-ალაე და სხვა. სახელი უიტბი მეთორმეტე საუკუნეში ეწოდა. საქსონებით დასახლებული ქალაქში სააბატო 657 წელს აშენდა ნორთუმბრიის მეფე ოსვის მიერ. ქალაქი აგრეთვე მოხსენიებულია ბრემ სტოკერის ცნობილ რომანში „დრაკულა“. აქ იმართება გოთური ტრადიციული ფესტივალი ყოველწლიურად, ოცდაათ ოქტომბრიდან პირველ ნოემბრამდე.

 

იპსვიჩი, საფოლკი: საფოლკის საგრაფოს ცნობილი ქალაქის სახელი „გიპესვიკიდან“ მომდინარეობს და თარიღდება მე-7 საუკუნით. 2013 წელს იპსვიჩსა და კოლჩესტერს შორის შუღლი გაჩაღდა, ამის მიზეზი „ბრიტანეთის უძველესი ჩანაწერი ქალაქის“ წოდება გახდა. ქალაქმა საკუთარ თავს „უძველესი ანგლო-საქსური ქალაქი“ უწოდა. ცნობილია რომ აქ უძველესი რომაული დასახლებები უფრო ადრე არსებობდა.

 

კოლჩესტერი, ესექსი: ქალაქში ნაპოვნია პალეოლითის ხანის ექვსი ხელცული. კოლჩესტერი ყველა სტუმარს ამცნობს რომ ის „ბრიტანეთის უძველესი ჩანაწერი ქალაქია“, რასაც პლინიუს უფროსის მიერ ახალი წელთაღრიცხვის 77 წელს მოხსენიება მოწმობს, რომელიც ამტკიცებს რომ კამულოდუნუმიდან 200 მილის დაშორებით მდებარეობდა ეს პატარა ქალაქი. მოგვიანებით ნორმანებმა კოლჩესტერის ციხე-სიმაგრის აგება დაიწყეს ინგლისის დაპყრობის ათწლეულის განმავლობაში.

 

კარმართენი, უელსი: კარმართენშირის საგრაფოს ცენტრი უელსის უძველეს ქალაქად მიიჩნევა. ქრისტეშობიდან 75 წლით თარიღდება აქ არსებული რომაული ფორტი. ქალაქი ინდუსტრიის ცენტრია, ქალაქ სუონსიდან სამხრეთ უელსის რკინიგზამ კარმართენამდე 1852 წელს მიაღწია.

 

აბინგდონი, ოქსფორდშირი: აქ აღმოჩენილი ქვის ხელცული ქრისტეშობამდე 4 000 წლის წინანდელია. ქალაქი აქტიური იყო ბრიტანულ რკინის ხანაში, ძველი წელთაღიცხვის 800-100 წლებში, რასაც მოწმობს ქალაქის ქვეშ არსებული თავდაცვითი სტრუქტურა.

 

თეტჩემი, ბერკშირი: მეზოლითის პერიოდის აღმოჩენებით მდიდარი ქალაქი დიდი ხნის განმავლობაში ითვლებოდა გაერთიანებული სამეფოს ყველაზე ძველ ქალაქად. ბრინჯაოსა და რკინის ხანის შემდეგ ზუსტად დღევანდელი თეტჩემის ადგილას რომაული ქალაქი არსებობდა. ქალაქმა მოსახლეობის უდიდესი დანაკარგი მე-14 საუკუნის შავი ჭირის დროს განიცადა. დღეს აქ 25 000 მოსახლე ცხოვრობს.

 

ეიმსბერი, უილტშირი: თეტჩემის პრეტენზია უძველესი ქალაქის წოდებაზე ბუკინგემის უნივერსიტეტის კვლევებმა დააცხრო, რის მიხედვითაც ქვეყნის უძველესი ქალაქი ეიმსბერი გახლავთ. ეიმსბერი სტოუნჰენჯის უძველეს მონუმენტზე, საიდანაც სულ ორი მილითაა დაშორებული, 5 000 წლით ადრეა დათარიღებული.