CNN - „ცოცხალი ბეტონი“ რომელიც ბზარებს თვითონ ამთელებს [Photos]

2015.05.20  |  13:51
CNN - „ცოცხალი ბეტონი“ რომელიც ბზარებს თვითონ ამთელებს [Photos]

ჰოლანდიელმა პროფესორმა ჰენკ იონკერსმა, დელფტის ტექნოლოგიის უნივერსიტეტიდან, ბეტონის ახალი სახეობა გამოიგონა, რომელიც გაჩენილ ბზარებს თავად ავსებს.

დღეისთვის ყველაზე ხმარებადი სამშენებლო მასალა, რომელიც 2000-ზე მეტი წლის წინ გამოიგონა ადამიანმა, შესაძლოა უფრო გამძლე გახდეს.

 

ბეტონს, რაც არ უნდა ყურადღებით იყოს შერეული, დროთა განმავლობაში მაინც უჩნდება ბზარები, რომლებიც შემდეგში ნგრევის მიზეზი ხდება.

 

„ბეტონის ბზარების მთავარი პრობლემა არის წყლის ჟონვა. თუ ბზარები გაჩნდა, წყალი მასში მიედინება, სახლებში, სარდაფებში, გარაჟებში, თანაც წყალი ფოლადის არმატურამდე მივა, რაც ბეტონს ვეღარ ამაგრებს და ნაგებობა ადვილად ინგრევა.“ – ამბობს ჰოლანდიის ქალაქ დელფტის უძველესი ტექნოლოგიის უნივერსიტეტის პროფესორი ჰენკ იონკერსი.

 

თუმცა მიკრობიოლოგმა პროფესორმა მოიფიქრა სრულიად ახალი გზა ბეტონის გამძლეობისთის.

 

„ჩვენ გამოვიგონეთ ბიო-ბეტონი, ესაა ბეტონი რომელიც საკუთარ თავს ბაქტერიის მეშვეობით შველის.“ – ამბობს იგი.

 

ბიო-ბეტონი შედგება ჩვეულებრივი ბეტონისა და დამატებული ინგრედიენტისგან – ე.წ. „მკურნალი აგენტისგან“. შერევისას ის დაუზიანებელი რჩება და მოქმედებას მაშინ იწყებს როდესაც ბეტონს ბზარი უჩნდება და მასში წყალი მოხვდება.

 

მიკრობიოლოგმა იონკერსმა მუშაობა 2006 წელს დაიწყო და სამი წელი დასჭირდა დასრულებამდე, თუმცა მანამდე რთული გამოწვევები გახდა დასაძლევი.

 

ბეტონი ტუტე-ნაერთია და მკურნალი ბაქტერია მასში მიძინებული უნდა ელოდოს წლების განმავლობაში წყლის მიერ გააქტიურებას.

 

იონკერსმა ჩხირისებრი ბაქტერია (ბაცილა) არჩია, რადგან ისინი ტუტე გარემოში ხარობენ და აწარმოებენ სპორებს, რომლებიც ათწლეულებს ძლებენ უწყლოდ და უჟანგბადოდ.

 

„საჭირო იყო ბაქტერია რომელიც მკაცრ გარემოსა და პირობებში, ბეტონში გაძლებს. ეს ხომ ქვასავით მშრალი მასალაა. შემდეგი პირობა კი გახლდათ არამარტო ბაქტერიის ცოცხლად ყოფნა ბეტონში, არამედ წარმოაქმნევინო მათ შესაკეთებელი მასალა – კირქვა.“

 

კირქვის წარმოშობისთვის ბაცილებს საკვები ესაჭიროებათ. იონკერსმა თავდაპირველად შაქრის შერევა მოიფიქრა, თუმცა ეს ბეტონს სუსტსა და რბილს გახდიდა. შემდეგ კი კალციუმის ლაქტატზე შეჩერდა, რომელიც ბაქტერიასთან ერთად სპეციალური კაპსულით შეერევა სველ ბეტონში. ბზარების გაჩენისას კი წყალი კაპსულას გახსნის და ბაქტერია გააქტიურდება. ბაცილა დაიყოფა, გამრავლდება და ლაქტატის მეშვეობით კირქვას ან კალციტს წარმოქმნის, რომელიც ბზარებს შეავსებს.

 

იონკერსი იმედოვნებს რომ მისი მიგნება ახალი ერის დასაწყისი გახდება მშენებლობაში: „ეს ბუნებისა და საშენებლო მასალის შერწყმაა, ბუნება ხელს გვიწყობს თავისუფალი მუშაობისთვის, ამ შემთხვევაში კირქვისწარმომქმნელ ბაქტერიისთვის. თუ ეს განხორციელდება ჩვენ ნამდვილად ვიხეირებთ მისგან, ასე რომ მგონი ეს მშვენიერი მაგალითია სრულიად ახალი კონცეფციისთვის.“ – დასძენს იონკერსი.