ზურგჩანთიანი ჟურნალისტიკის კურსი უფასოდ – მიღება 10 იანვრამდე

2015.01.07  |  14:18
ზურგჩანთიანი ჟურნალისტიკის კურსი უფასოდ – მიღება 10 იანვრამდე

საინფორმაციო ცენტრების ქსელი პროექტის „ზურგჩანთიანი ჟურნალისტები ადამიანის უფლებებისათვის“ ფარგლებში აცხადებს კიდევ ერთ კონკურსს მოქალაქე რეპორტიორების შესარჩევად. პროექტის მიზანია საქართველოს რეგიონებში მოქალაქე რეპორტიორების მომზადება საზოგადოებრივი ინტერესების გამომხატველი ახალი მედიის განვითარებისთვის.

პროექტის ფარგლებში შერჩეულ 10 მოქალაქეს პროფესიონალი ტრენერები შეასწავლიან ჟურნალისტიკის პრაქტიკულ უნარებს: ინფორმაციის მოძიება, ფოტო ვიდეო გადაღება, მონტაჟი, ლაივსტრიმინგი; ახალი მედიის სხვა ინსტრუმენტებს, სამოქალაქო ინიციატივების მხარდასაჭერად ახალი მედიის და სოციალური ქსელების აქტიურ გამოყენებას;

 

კონკურსში მონაწილეობა შეუძლიათ 16–დან 35 წლამდე ასაკის მოქალაქეებს.

 

შერჩევისას უპირატესობა მიენიჭებათ ახალი მედიის ინსტრუმენტების შესასწავლად შესაბამისი უნარების მქონე ახალგაზრდებს, რომლებიც ცხოვრობენ საქართველოს რეგიონებში, განსაკუთრებით მაღალმთიან ან საზღვრისპირა მუნიციპალიტეტებში, კონფლიქტის ზონაში, წარმოადგენენ რომელიმე ეროვნულ უმცირესობას. სამუშაო ენა – ქართული.

 

სწავლების პერიოდში [7 დღე] კონკურსის შედეგად შერჩეული ახალგაზრდების სასტუმროში ცხოვრების და კვების ხარჯებს დააფინანსებს საინფორმაციო ცენტრების ქსელი. პროექტის მონაწილეები უზრუნველყოფილები იქნებიან საჭირო ტექნიკური აღჭურვილობით. სწავლება გაიმართება 2015 წლის იანვარში. სწავლების დასრულების შემდეგ შესაბამისი შეფასების მქონე ახალგაზრდები მიიღებენ სერთიფიკატს.

 

პროექტის მონაწილეებს საინფორმაციო ცენტრების ქსელი სთავაზობს შემდგომ დასაქმებას. ადამიანის უფლებებზე ფოტო და ვიდეორეპორტაჟების მომზადებისათვის მოქალაქე რეპორტიორები მიიღებენ ჰონორარს. მათ შეეძლებათ მონაწილეობა მიიღონ საინფორმაციო ცენტრების ქსელის და მისი პარტნიორი ახალი მედიის ორგანიზაციების სხვა პროექტებშიც.

 

დაინტერესებულმა ახალგაზრდებმა 10 იანვრის ჩათვლით უნდა შეავსონ სააპლიკაციო ფორმა (ჩამოტვირთეთ ამ მისამართიდან) და გამოგზავნონ ელექტრონული ფოსტის შემდეგ მისამართზე: info@16100.ge დაუკავშირდებიან მხოლოდ შერჩეულ კანდიდატებს.

 

საინფორმაციო ცენტრების ქსელი პროექტს „ზურგჩანთიანი ჟურნალისტები ადამიანის უფლებებისათვის“ ახორციელებს ამერიკული ორგანიზაციის „ეროვნული წვლილი დემოკრატიისთვის“ [NED] მხარდაჭერით.

 

საინფორმაციო ცენტრების ქსელი დამოუკიდებელი ორგანიზაციაა, რომელიც ამუშავებს კახეთის (www.ick.ge), მცხეთა – მთიანეთის (www.icmm.ge), ქვემო ქართლის (www.icn.ge) საინფორმაციო ცენტრებს და საინფორმაციო ცენტრს 16 100 (www.16100.ge);

 

2010 წლიდან დღემდე საინფორმაციო ცენტრების ქსელს განხორციელებული აქვს სხვადასხვა პროექტები, ფონდ „ღია საზოგადოება საქართველოს“ (OSGF), ამერიკის შეერთებული შტატების საელჩოს, საერთაშორისო კვლევებისა და გაცვლების საბჭოს (IREX), ევრაზიის თანამშრომლობის ფონდის და სხვა ორგანიზაციების მხარდაჭერით.

 

2014 წელს კახეთის საინფორმაციო ცენტრმა [www.ick.ge] ნომინაციაში ყველაზე ინფორმაციული სააგენტო „ევროკავშირის პრიზი“ მიიღო.