ტელეკომპანია „მაესტროში“ რეორგანიზაცია გამოცხადდა

2014.12.22  |  15:03
ტელეკომპანია „მაესტროში“ რეორგანიზაცია გამოცხადდა

ტელეკომპანია „მაესტროში“ სრული რეორგანიზაცია გამოცხადდა. არხის დირექციის განცხადებით, აღნიშნული გადაწყვეტილება მას შემდეგ მიიღეს, რაც საინფორმაციო სამსახურის უფროსის ნინო ჟიჟილაშვილის გათავისუფლების შემდეგ არხი პროტესტის ნიშნად ჟუნრალისტების ნაწილმა და რამდენიმე პროდიუსერმა დატოვა. 

„ტელეკომპანია „მაესტრო“ ადასტურებს, რომ არხი დატოვა დირექტორის მოადგილემ და „ცხრიანის“ წამყვანმა ნინო ჟიჟილაშვილმა. მასთან ერთად, არხიდან წავიდა რამდენიმე პროდიუსერი და ჟურნალისტების ნაწილი. შექმნილი სიტუაციიდან გამომდინარე, „მაესტროს“ დირექციამ მიიღო გადაწყვეტილება, გამოაცხადოს არხის სრული რეორგანიზაცია, რომელიც მანამდე ისედაც იგეგმებოდა. გენერალური დირექტორი ბაია გადაბაძე კიდევ ერთხელ ადასტურებს, რომ ახალი ამბები რჩება არხის პრიორიტეტად, რომელიც რეორგანიზაციის შემდეგ განახლებული ფორმატით და ბადით დაუბრუნდება სატელევიზიო სივრცეს“, - ნათქვამია განცხადებაში.

 

„მაესტროს“ საინფორმაციო სამსახურის ყოფილი მთავარი პროდიუსერის სოფო ზურაბიანის განცხადებით, მან არხი საკუთარი განცხადების საფუძველზე დატოვა მიზეზი კი მომავალი წლის საეთერო ბადეა, სადაც „მაესტროს 9-იანი“ ამოღებულია.

 

„მივიღე გადაწყვეტილება არხის დატოვებასთან დაკავშირებით. მიზეზი გახდა ის, რომ  მე ვარ „9-იანის“ მთავრი პროდიუსერი. ახალი სეზონიდან კი გადაცემა ბადეში აღარ ზის. ნინო ჟიჟილაშვილი ისედაც მიდიოდა“,- განაცხადა სოფო ზურაბიანმა.

 

ჟურნალისტ გიგი გაგუას თქმით, მათ არხის ხელმძღვანელებმა მიაწოდეს ინფორმაცია, რომლის მიხედვითაც „მაესტროს 9-იანის“ ნაცვლად ეთერში კოკა ყანდიაშვილის გადაცემა გავა.

 

„მე როგორც უცხოეთის ბლოკის რედაქტორი- ჟურნალისტი ვტოვებ „მაესტროს“. ამასთან დაკავშირებით განცხადება უკვე დაწერილი მაქვს. მიზეზი არის ის, რომ მე ვერ მომცეს იმის გარანტია, რომ იქნებოდა საინფორმაციო დამოუკიდებლობა. მე ვერ ვიმუშავებ იმ გარემოში, სადაც კოკა ყანდიაშვილმა უნდა გვიკარნახოს თუ რა დოზით უნდა გავაშუქოთ მოვლენა“,- აღნიშნა გიგი გაგუამ.

 

არსებული ინფორმაციით, „მაესტროზე“ დღეს კოკა ყანდიაშვილი შეაჯამებს. ყანდიაშვილის გადაცემა ყოველ სამუშაო დღეს 20:00 დან 22:00 მდე იქნება. უცნობია გადაცემის სახელი.

 

ყანდიაშვილის თქმით, „მაესტროზე“ მუშაობის დაწყების თაობაზე ტელეკომპანიის ხელმძღვანელობასთან მოლაპარაკებები უკვე ნახევარ წელზე მეტია მიმდინარეობს.