ფანჯარა ცხინვალში



არასოდეს დავფიქრებულვარ იმაზე, რომ ცხინვალში არცერთი ბანკი არ არის! 

როდესაც „ბლოგპოსტი“ დავიწყეთ, რეალურად, გააზრებული არ მქონდა, როგორ უნდა ჩაგვერიცხა ჰონორარი ჩვენი ბლოგერებისთვის. ვერ ვიტყვი, რომ თავიდან ყველაფერი მარტივი მეჩვენებოდა, მაგრამ ვფიქრობდი (თავს ვიმშვიდებდი), რომ შეუძლებელი არაფერია.

 

„მედია პორტალის“ თხოვნით, აფხაზი და ოსი ბლოგერები თავის ყოველდღიურობაზე დაწერენ, მერე გამოგვიგზავნიან, მერე ჩვენ გამოვაქვეყნებთ, მერე რუსულად ვთარგმნით, მერე ახალ ბლოგერებს ვიპოვით და ერთდროულად რამდენიმე ადამიანს ვთხოვთ წერონ იმაზე, თუ რა ხდება ოჩამჩირეში, გალში ან ცხინვალის რეგიონში. ჩვენ მათსას გავიგებთ, ისინი - ჩვენსას.

 

კიდევ კარგი, თავიდან არ ვიცოდი რამდენ სირთულესთან იქნებოდა ეს პროექტი დაკავშირებული, თორემ, შეიძლება ხელი ამეღო. ბლოგპოსტი ისე დავიწყეთ რომ რეალურად, გააზრებული არ მქონია, რა ძნელია, იცხოვრო თვითაღიარებულ სახელმწიფოში, რომელსაც დანარჩენი მსოფლიო არ ცნობს. ოდესღაც ჩვენც ვცხოვრობდით ბანკებისა და საკრედიტო ბარათების გარეშე, მაგრამ ახლა ისე ბუნებრივად ვთხოვე ჩვენს ცხინვალელ ბლოგერს საკუთარი ანგარიშის ნომერი, თითქოს, სახელს ან გვარს ვეკითხებოდი. პასუხმა გამაოცა:

- ცხინვალში ბანკი არ არის.

- როგორ?

- ბანკი არ გვაქვს აქ.

- ააა, ქართული ბანკი არ არის, რუსული ბანკის ანგარიშზე ჩავრიცხავთ ჰონორარს...

- საერთოდ არ არის ბანკი, არანარი!

გავარკვიე, რომ თურმე ცხინვალში მხოლოდ ფულადი გზავნილების სისტემა „კონტაქტ პერევოდი“ მოქმედებს, თუმცა ამ ქსელს ჩვენს ტერიტორიაზე ფილიალიც კი არ აქვს.

 

როგორც აღმოჩნდა, თვითაღიარებულ რესპუბლიკაში მცხოვრებლებთან თანამშრომლობის იურიდიული ჩარჩოებიც არ არსებობს. თითქოს, ვიღაცამ საგანგებოდ დაგეგმა, რომ კონფლიქტის ორივე მხარეს ადამიანები ერთმანეთს არ ეკონტაქტონ, პროექტები ერთად არ განახორციელონ, რომ შემთხვევით ერთმანეთს უკეთ არ გაუგონ.

 

არ ვიცი რას აკეთებენ ისინი, ვისაც „ხიდს იქით“ ნათესავი ან ახლობელი ჰყავს. როგორ ახერხებენ, რომ ფული გადაურიცხონ და დაეხმარონ... ჩვენ გაგვიმართლა, რომ „მედია პორტალის“ დირექტორი ნათია აბრამია ლონდონში ცხოვრობს. მას ცხინვალში გადასარიცხი ჰონორარი ჩავურიცხეთ და ვთხოვეთ „კონტაქტ პერევოდის“ ფილიალი ლონდონში მოეძებნა.

 

„ვიპოვე! უკვე დავრეკე კონტაქტ პერევოდში, ინგლისური არ იციან თანამშრომლებმა, ჩემი მეგობარი მარკო მეხმარება და პორტუგალიურიდან მითარგმნის მათ სიტყვებს. შეუძლიათ გადარიცხვა ცხინვალში. დღეს მივალ და ყველაფერს გაგაგებინებთ“, – SMS მოგვწერა ნათიამ.

 

თითქმის მოგვარდა ყველაფერი!

 

თუმცა მალე კიდევ ერთი შეტყობინება და ვიდეო მესიჯი მივიღეთ ნათიასგან:

 

„ვერ ვპოულობ! ისინი მარკოს უხსნიან ზუსტად სად მივიდე, მერე მარკო მირეკავს და მიხსნის მე... ამ გაფუჭეული ტელეფონით რაღაც ჯურღმულში ამოვყავი თავი! მეუბნებიან, რომ ერთ-ერთი კარებიდან შევალ მათ ოფისში, მაგრამ ვერ ვნახე ეს კარები!!! თან აქ ცუდად იჭერს!!! 1 საათში თუ არ გამოვჩნდი მომიკითხეთ.“

 

მცირე ნერვიულობის შემდეგ ნათიამ ჰონორარი „კონტაქტ პერევოდის“ ლონდონის ოფისიდან ცხინვალში ჩვენს ბლოგერს გადაურიცხა. ახლა უკვე მივაგენით ლონდონში „კონტაქტ პერევოდის“ ოფისს და ვიცით, რომელი კარის უკან იმალება ის ჯადოსნური ოფისი, საიდანაც ცხინვალში ფულის გადარიცხვა შეიძლება.

 

ნეტა, რა დაშავდება ერთი ასეთი კარი ან ფანჯარა თბილისშიც რომ იყოს.

 

 

ირინა ალიაშვილი | Mediaportal



 

ირინა ალიაშვილი - არასამთავრობო ორგანიზაცია „მედია პორტალის“ ჟურნალისტი