ერთი თვეა შატილი ელექტროენერგიის გარეშეა დარჩენილი

2016.10.17  |  10:33
ერთი თვეა შატილი ელექტროენერგიის გარეშეა დარჩენილი

პირიქითა ხევსურეთში შატილი ერთადერთი სოფელია, რომელსაც ელექტროენერგია მიეწოდებოდა. ერთი თვეა შატილიც ელექტროენერგიის გარეშეა დარჩენილი. მცირე ჰესი, რომელიც შატილს ელექტროენერგიით ამარაგებდა, მწყობრიდან გამოვიდა და დაზუსტებით არის არის ცნობილი, როდის შეძლებს ხელისუფლება მის აღდგენას. სოფელში ამ დროისთვის 13 ოჯახია დარჩენილი. შატილში პროგრამის „ასწავლე საქართველოში“ ფარგლებში ჩასული რამდენიმე მასწავლებელიც ცხოვრობს, რომლებიც გათბობის გარეშე არიან დარჩენილები. შატილში უკვე თოვს. რამდენიმე დღეში, სავარაუდოდ, ხევსურეთთან დამაკავშირებელი ერთადერთი საავტომობილო გზაც ჩაიკეტება.

მცირე ჰესი, რომელიც შატილს ელექტროენერგიით ამარაგებდა, დაახლოებით ერთი თვის წინ დაზიანდა. ადგილობრივების თქმით, ჰესის ტურბინები მოძველებული იყო და მწყობრიდან ყოველ წელს გამოდიოდა.

 

„მას შემდეგ რაც ჰესი დაზიანდა, გამგეობამ ორი გენერატორი და საწვავი ჩამოიტანა. შუქი დილა საღამოს გვაქვს. დილით, 09:00-დან 11:00 საათამდე და საღამოს 19:00-დან 23:00 საათამდე, ჯამში 6 საათი. მუშები არიან და აკეთებენ, მაგრამ აქამდე რომ მიეხედათ ჰესისთვის, უკეთესი იქნებოდა. ერთი პრობლემა ის არის, რომ მასწავლებლები არიან ჩამოსულები შატილში, ელექტროგამათბობლით თბებიან და ეს გრაფიკი საკმარისი არ არის. თან გუშინ გაავდრდა და თოვს, გათბობა ხომ უნდათ. გზა ოქტომბრის ბოლოს იკეტება ხოლმე. იმედია, ჯერ არ დაიკეტება და მოასწრებენ ჰესის გაკეთებას. როგორც გვითხრეს, დეკემბერში გაკეთდებაო“, - უთხრა მცხეთა – მთიანეთის სიანფორმაციო ცენტრს შატილში მცხოვრებმა შორენა ლიქოკელმა.

 

„მასწავლებლებს საცხოვრებელი ფართი ნაქირავები აქვთ. მეპატრონეს სახლი გარემონტებული აქვს და შეშის ღუმელს ვერ დგამენ, ამიტომ, ელექტროენერგიით თბებიან. გენერატორი ჰესის გაფუჭებიდან დაახლოებით ერთ თვეში მოიტანეს, ჰესის ნაწილები კი ქუთაისში აქვთ წაღებული გასაკეთებლად და როგორც თქვეს, ერთ თვეში გაკეთდებაო“, - ამბობს შატილის მკვიდრი მინდია ჭინჭარაული.

 

სკოლის დირექტორის მაყვალა დაიაურის თქმით, სკოლასა და პანსიონში ბავშვები შეშით თბებიან. შატილის სკოლაში სულ 7 მოსწავლე სწავლობს, აქედან ოთხი, იქვე, პანსიონში ცხოვრობს. სამი ბავშვი სოფელ მუცოდან არის. ზამთარში, დიდთოვლობის დროს მუცოდან შატილამდე გადაადგილება რთული ან შეუძლებელია.

 

დუშეთის მუნიციპალიტეტის გამგებლის ვაჟა ჩოხელის განცხადებით, ჯერ უცნობია როდის დასრულდება დაზიანებული ჰესის შეკეთება. მისივე თქმით, შატილის მაცხოვრებლებს გენერატორის საშუალებით იქამდე მოამარაგებენ, ვიდრე შატილს ელექტროენერგიის მიწოდება არ აღუდგება.

 

„შატილის ჰესის ორივე ტურბინა და გენერატორია დაზიანებული. ინტენსიურად მიმდინარეობს აღდგენითი სამუშაოები. გუშინ კიდევ ჩამოვიდნენ სპეციალისტები, სათავე მოაწესრიგეს. ჩართულია ენერგეტიკის სამინისტრო, მთავრობა და რაც შეიძლება მოკლე დროში მოხდება აღდგენა. წინასწარ ვერ გეტყვით რა ვადაში. ცდილობენ, რომ რაც შეიძლება მოკლე ხანში დასრულდეს რემონტი. ადგილზე დიზელ-გენერატორი და 7 ტონა საწვავი გვაქვს მიტანილი. სანამ არ აღდგენა ელექტროენერგიის მიწოდება, მანამდე ასე მივაწვდით შუქს, შეშით მომარაგებაზეც ვფიქრობთ“, - განუცხადა მცხეთა-მთიანეთის საინფორმაციო ცენტრს ვაჟა ჩოხელმა.

 

იმ შემთხვევაში თუ მოსახლეობას ელექტროენერგიის მიწოდება არ აღუდგა, ადგილობრივების თქმით, ისინი იძულებულები გახდებიან ხევსურეთი დატოვონ.