ყაზბეგი – თუშეთის და ახმეტა – თიანეთის გზების რეაბილიტაციის პროექტები არ არსებობს

2016.09.07  |  10:23
ყაზბეგი – თუშეთის და ახმეტა – თიანეთის გზების რეაბილიტაციის პროექტები არ არსებობს

„უახლოეს დღეებში ალბათ გამოვლინდება კომპანია, რომელიც დაიწყებს ახმეტა – თიანეთის გზის მშენებლობას და ეს იქნება ახმეტისთვის ახალი სიცოცხლის მიცემის შანსი“; „თბილისიდან თუშეთამდე ევროპული სტანდარტების გზა აშენდება იმისათვის, რომ ყველა ტურისტმა უსაფრთხოდ და რაც შეიძლება მოკლე დროში მოახერხოს თუშეთში ამოსვლა“, - პრემიერ – მინისტრის და ხელისუფლების სხვა წარმომადგენლების ამ განცხადებების მიუხედავად, კახეთის საინფორმაციო ცენტრმა გამოარკვია, რომ ჯერ არც ახმეტა – თიანეთის გზის რეაბილიტაციის და არც სნო-ჯუთა-როშკა-შატილი-ომალო-ფშაველის გზის მშენებლობის პროექტები არ არსებობს.

4 სექტემბერს პრემიერ-მინისტრმა გიორგი კვირიკაშვილმა ახმეტაში „ქართული ოცნებიდან“ მაჟორიტარი დეპუტატობის კანდიდატი გელა სამხარაული წარადგინა. ამომრჩევლებთან შეხვედრისას გელა სამხარაულმა აღნიშნა: „უახლოეს დღეებში ალბათ გამოვლენილი იქნება კომპანია, რომელიც დაიწყებს გზის მშენებლობას ახმეტა-თიანეთის მიმართულებით და ეს იქნება ახმეტისთვის ფაქტობრივად ახალი სიცოცხლის მიცემის შანსი, ვინაიდან დღეს ახმეტა ჩიხია. ამ ყველაფერს მოყვება ტურიზმის განვითარება“.

 

ახმეტა – თიანეთის გზის რეაბილიტაციასთან დაკავშირებით, დეტალური ინფორმაციის მისაღებად, კახეთის საინფორმაციო ცენტრმა რეგიონული განვითარებისა და ინფრასტრუქტურის სამინისტროს მიმართა. სამინისტროში გვითხრეს, რომ პროექტი თიანეთი-ახმეტის საავტომობილო გზის 28 კილომეტრიანი მონაკვეთის რეაბილიტაციას გულისმობს და მისი განხორციელება უკვე იწყება.

 

„გზის რეაბილიტაციას მსოფლიო ბანკი დააფინანსებს. 28 კილომეტრიანი მონაკვეთის პროექტირება-მშენებლობა პარალელურ რეჟიმში განხორციელდება. ამ ეტაპზე, მსოფლიო ბანკთან სატენდერო დოკუმენტაციის შეთანხმების პროცედურები მიმდინარეობს“, - განაცხადა სამინისტროს საზოგადოებასთან ურთიერთობის დეპარტამენტის უფროსმა ხათუნა პაიჭაძემ.

 

კახეთის საინფორმაციო ცენტრი მსოფლიო ბანკის საქართველოს წარმომადგენლობასაც დაუკავშირდა, სადაც აღნიშნეს, რომ ახმეტა – თიანეთის გზის რეაბილიტაციის პროექტთან დაკავშირებით ჯერ საბოლოო შეთანხმებაც კი არ არის მიღწეული და ამ ეტაპზე ტენდერის გამოცხადებაზე საუბარი ნაადრევია.  

 

„ახმეტა – თიანეთის გზის რეაბილიტაცია უნდა განხორციელდეს „საქართველოს მეორადი მნიშვნელობის გზების აქტივობის მართვის პროექტის“ ფარგლებში. ამ დროისთვის მსოფლიო ბანკსა და საავტომობილო გზების დეპარტამენტს შორის მოლაპარაკება მიმდინარეობს და არანაირი ტენდერის გამოცხადებაზე საუბარი ჯერ არ არის. თარიღიც არ ვიცით როდის გამოცხადდება. წლის ბოლომდე იქნება გამოცხადებული ტენდერი, ნოემბერში ან დეკემბერში, მაგრამ ზუსტად როდის, ჯერ ვერ ვიტყვით“, - აღნიშნა მსოფლიო ბანკის საქართველოს წარმომადგენლობის საგარეო ურთიერთობათა სამსახურის ხელმძღვანელმა ინგა პაიჭაძემ.

 

წინასაარჩევნოდ, საქართველოს პრემიერ – მინისტრის გიორგი კვირიკაშვილის და მაჟორიტარობის კანდიდატების მიერ არაერთხელ გაკეთდა განცხადება, რომ სნო-ჯუთა-როშკა-შატილი-ომალო-ფშაველის დამაკავშირებელი, ევროპული სტანდარტების გზა აშენდება.

 

„ჩვენ განსაკუთრებულ ყურადღებას ვაქცევთ და მივაქცევთ თუშეთის განვითარებას. თუშეთს გააჩნია უდიდესი პოტენციალი ტურიზმის თვალსაზრისით. ჩვენ უკვე დაწყებული გვაქვს ტენდერი გზის პროექტირებაზე, რომელიც აუცილებლად აშენდება და იქნება საქართველოს დედაქალაქიდან თუშეთამდე მიმავალი თანამედროვე ევროპული სტანდარტების გზა იმისათვის, რომ ყველა ტურისტმა უსაფრთხოდ და რაც შეიძლება მოკლე დროში მოახერხოს თუშეთში ამოსვლა. ასევე ძალიან მნიშვნელოვანია მთიანი რეგიონების შემაერთებელი გზები, რაზედაც ასევე ვმუშაობთ. ძალიან მნიშვნელოვანია, რადგან სხვაგვარად შეუძლებელი იქნება ამ მხარის მომავალი თაობებისთვის შენარჩუნება. ამ გზას ექნება ბევრი დანიშნულება, პირველ რიგში ტურიზმის განვითარების, რათა აქაურმა ოჯახებმა მეტი ინტერესი ნახონ და ჰქონდეთ მეტი ინტერესი იმისთვის, რომ მცირე სასტუმროები გაიხსნას. ამ გზას ექნება უსაფრთხოების დანიშნულება, რადგან ეს არის ჩვენი სასაზღვრო რეგიონი და ძალიან დიდი მნიშვნელობა აქვს ამ რეგიონში მოსახლეობის დამაგრებას. რა თქმა უნდა, ამ გზას ასევე ექნება კულტურული მემკვიდრეობის შენახვის დანიშნულება, რადგან გზის და ინფრასტრუქტურის გარეშე ეს იქნება შეუძლებელი“, – განაცხადა პრემიერ – მინისტრმა 11 აგვისტოს, თუშეთში ყოფნისას.

 

სნო-ჯუთა-როშკა-შატილი-ომალო-ფშაველის გზის პროექტირებაზე კონკურსი 2016 წლის 9 აგვისტოს გამოცხადდა. კონკურსში მონაწილეობის მსურველებს წინადადებების წარდგენა 21-დან 26 აგვისტოს ჩათვლით შეეძლოთ, თუმცა გზის პროექტირებაზე წინადადებების მიღების ვადა 16 სექტემბრიდან 21 სექტემბრის ჩათვლით გახანგრძლივდა.

 

„საკმაოდ ხანგრძლივი პროცედურებია, წინადადებების მიღება 16 სექტემბერს დაიწყება და 21 სექტემბრის ჩათვლით გაგრძელდება. ამის შემდეგ დაიწყება წინადადებების შერჩევა. შედგება მოკლე სია მათი, ვინც ყველა პარამეტრს აკმაყოფილებს. ამის შემდეგ გამოვლინდება გამარჯვებული. ხანგრძლივი პროცესია და მინიმუმ ერთი თვე გამარჯვებული ვერ გამოვლინდება“, - განუცხადა კახეთის საინფორმაციო ცენტრს საავტომობილო გზების დეპარტამენტის საზოგადოებასთან ურთიერთობის სამსახურის წამომადგენელმა თამარ ჯაფარიძემ.

 

სახელმწიფო შესყიდვების სააგენტოს მიერ ადმინისტრირებულ ვებგვერდზე 18 აგვისტოს განთავსებული კომისიის სხდომის ოქმის მიხედვით, გადავადების ოფიციალურ მიზეზად, სახელდება პროექტის მასშტაბურობისა და მაღალი ღირებულების გამო საკონკურსო დოკუმენტაციის დახვეწის მიზანშეწონილობა, ასევე უცხოური კომპანიების მხრიდან გამოვლენილი მაღალი ინტერესი და ამის გამო საკონკურსო დოკუმენტაციის ინგლისურენოვანი ვერსიის მომზადებისა და გამოქვეყნების აუცილებლობა.