ხურვალეთსა და წითელუბანთან რუსმა და ოსმა სამხედროებმა საქართველოს დროშა ჩამოხსნეს

2015.07.16  |  15:49
ხურვალეთსა და წითელუბანთან რუსმა და ოსმა სამხედროებმა საქართველოს დროშა ჩამოხსნეს

ოკუპირებული სამხრეთ ოსეთის ე.წ. საზღვართან ქართული დროშა ჩამოხსნეს. ხურვალეთში, იქ, სადაც საქართველოს სახელმწიფო სიმბოლო ჟურნალისტებმა აღმართეს, ე.წ. მესაზღვრეები მივიდნენ და ქართველ და უცხოელ კორესპონდენტებს სასაზღვრო რეჟიმის დარღვევის შემთხვევაში პატიმრობით დაემუქრნენ.

 

ამერიკელი ჟურნალისტების ფოტო ობიექტივმა კი ჩასაფრებული შეიარაღებული პირები აღბეჭდა. ისინი რუსულად საუბრობდნენ. შეიარაღებული პირები რუსული საჯარისო დანაყოფის წარმომადგენლები და ასევე ოსური სპეცრაზმის წევრები არიან. მათთან ერთად ცოტა ხნის წინ ცხინვალის ხელისუფლების ერთ-ერთი წარმომადგენელი რობერტ გაზაევი გამოჩნდა.

 

„აქ გადის ე.წ. სამხრეთ ოსეთის სახელმწიფო საზღვარი და იმ შემთხვევაში, თუ გადაადგილებისგან თავს არ შეიკავებთ შესაბამის ზომებს მივიღებთ“, - განუცხადა გაზაევმა ქართველ ჟურნალისტებს.

 

რობერტ გაზაევის თქმით, ბოლო დღეების განმავლობაში კონფლიქტის ზონაში განვითარებულ მოვლენებთან დაკავშირებით მსჯელობა ორშაბათს, ერგნეთში ინციდენტების პრევენციის ფორმატში დაგეგმილ რიგგარეშე სხდომაზე შედგება.

 

სოფლების, წითელუბნის და ხურვალეთის მიმდებარე ტერიტორიაზე ადგილობრივ მოსახლეობას ცოტა ხნის წინ სასოფლო-სამეურნეო სამუშაოების ჩატარების საშუალება აღარ მისცეს. ასევე, ამ ტერიტორიაზე წითელუბნელები პირუტყვს აძოვებდნენ და შეიარაღებულმა ფორმიანებმა მათაც მოსთხოვეს, რომ დაუყოვნებლივ დაეტოვებინათ აღნიშნული ტერიტორია.

 

ადგილზე იმყოფებიან ქართველი სამართალდამცავებიც.